Día do Emprendedor de Galicia, o 16 de xuño en Santiago

O vindeiro 16 de xuño terá lugar no Palacio de Congresos de Santiago de Compostela a V edición do Día do Emprendedor de Galicia, que organiza a Consellería de Economía e Industria a través do Igape e Bic Galicia, coa colaboración do MITYC, a través da Dirección General de Política de la Pyme, e de numerosas entidades.

O programa deste ano incorpora un amplo abano de liñas temáticas que abranguen asuntos de interese para o emprendedor como son os negocios tecnolóxicos, o financiamento ou a internacionalización.

As sesións do evento están pensadas para e por emprendedores, con relatorios amenos coma os do itinerario de Iniciador Galicia, onde haberá unha variada mostra de startups galegas. Ademais haberá corners de asesoramento, de financiamento, de cooperativismo e economía social, así como un espazo organizado dende a Consellería de Educación e dedicado a alumnos ou ex - alumnos da formación profesional.

O Día do Emprendedor de Galicia disporá de liñas de asesoramento onde os emprendedores asistentes poderán contactar con profesionais relacionados coa creación de empresas. Para iso, deberán inscribirse previamente a través da web www.diaemprendedor.com, onde tamén se pode consultar o programa, así como máis información sobre os contidos e relatores que intervirán do Día do Emprendedor 2010. Tamén pode atopar novidades do evento nas redes sociais facebook, twitter e linkedin.